Surah 52 · 49 verses · Tgk. H. Mahjiddin Jusuf

Surah At-Tur in Achinese

In English with tafsir

بِسۡمِ ٱللَّهِ ٱلرَّحۡمَٰنِ ٱلرَّحِيمِ

52:1

وَٱلطُّورِ

Demi Thursina nama buket nyan

52:2

وَكِتَٰبٍ مَّسۡطُورٍ

Demi kitab nyang meutuleh harah

52:3

فِي رَقٍّ مَّنشُورٍ

Keureutah teuleung sinan meutuleh

52:4

وَٱلۡبَيۡتِ ٱلۡمَعۡمُورِ

Demi rumohjih nyang makmt luah Nyan keuh geuboh nanjih Baitul Makmur

52:5

وَٱلسَّقۡفِ ٱلۡمَرۡفُوعِ

Langet meuceuhu manyang ngon meugah

52:6

وَٱلۡبَحۡرِ ٱلۡمَسۡجُورِ

Laot meu apui pih takalon ju

52:7

إِنَّ عَذَابَ رَبِّكَ لَوَٰقِعٌ

Azeub Tuhanku keu ureueng salah Hana peue tachok azeub Po gata

52:8

مَّا لَهُۥ مِن دَافِعٍ

Atra nyan teuka han ek soe peuglah

52:9

يَوۡمَ تَمُورُ ٱلسَّمَآءُ مَوۡرًا

Watee meuguncang langet meuyok-yok

52:10

وَتَسِيرُ ٱلۡجِبَالُ سَيۡرًا

Gunong dum jijak anco ngon bicah

52:11

فَوَيۡلٌ يَوۡمَئِذٍ لِّلۡمُكَذِّبِينَ

Uroe nyan teuma ceulaka keubit Awak nyan sulet jikheun keu Allah

52:12

ٱلَّذِينَ هُمۡ فِي خَوۡضٍ يَلۡعَبُونَ

Jimaen di jih dalam buet jeuheut

52:13

يَوۡمَ يُدَعُّونَ إِلَىٰ نَارِ جَهَنَّمَ دَعًّا

Uroe nyan azeub keu jih that leupah Geutiek geuseumpom dalam nuraka

52:14

هَٰذِهِ ٱلنَّارُ ٱلَّتِي كُنتُم بِهَا تُكَذِّبُونَ

Nyang sulet raya dilee ka peugah Yoh dilee kakheun hana nuraka

52:15

أَفَسِحۡرٌ هَٰذَآ أَمۡ أَنتُمۡ لَا تُبۡصِرُونَ

Peue sihe teuma jinoe di keu kah Atawa hana leumah kakalon

52:16

ٱصۡلَوۡهَا فَٱصۡبِرُوٓاْ أَوۡ لَا تَصۡبِرُواْ سَوَآءٌ عَلَيۡكُمۡۖ إِنَّمَا تُجۡزَوۡنَ مَا كُنتُمۡ تَعۡمَلُونَ

Boh jak lop keunan laju beu bagah Got pih kasaba ngon han kasaba Saban cit juga hana meuubah Peue nyang kapubuet yoh masa dilee Meunan meuteuntee bandum geubalah

52:17

إِنَّ ٱلۡمُتَّقِينَ فِي جَنَّٰتٍ وَنَعِيمٍ

Keubit roe teuma ureng takwa Dalam churuga nikmat that leupah

52:18

فَٰكِهِينَ بِمَآ ءَاتَىٰهُمۡ رَبُّهُمۡ وَوَقَىٰهُمۡ رَبُّهُمۡ عَذَابَ ٱلۡجَحِيمِ

Peue nyang ka Neubri uleh Po gopnyan Meuseunang-seunang hanaban peugah Azeub nuraka hana di gopnyan Hana troh keunan Neubri le Allah

52:19

كُلُواْ وَٱشۡرَبُواْ هَنِيٓـَٔۢا بِمَا كُنتُمۡ تَعۡمَلُونَ

Makan ngon minom ladat hanaban Nyan keuh balasan buet teuh jroh leupah

52:20

مُتَّكِـِٔينَ عَلَىٰ سُرُرٍ مَّصۡفُوفَةٍۖ وَزَوَّجۡنَٰهُم بِحُورٍ عِينٍ

Geuduek meusadeu taeu di sinan Leupah that seunang ateuh peuratah Peuratah pih dum meubanja-banja Ngon aneuk dara dum ceudah-ceudah Judo ureueng nyan budiadari Nyan keuh Kamoe bri akan beunalah

52:21

وَٱلَّذِينَ ءَامَنُواْ وَٱتَّبَعَتۡهُمۡ ذُرِّيَّتُهُم بِإِيمَٰنٍ أَلۡحَقۡنَا بِهِمۡ ذُرِّيَّتَهُمۡ وَمَآ أَلَتۡنَٰهُم مِّنۡ عَمَلِهِم مِّن شَيۡءٍۚ كُلُّ ٱمۡرِيِٕۭ بِمَا كَسَبَ رَهِينٌ

Ureueng mukmin dum ngon keturunan Gopnyan meuiman sit akan Allah Aneuk ngon cuco geuh nyang meuiman Saban ngon gopnyan Kamoe bri jatah Hana meubacut pih na meukureueng Amai geuh bandum sep Kamoe balah Balaku amai keu abndum insan Nyan keuh jaminan jitueng phaedah

52:22

وَأَمۡدَدۡنَٰهُم بِفَٰكِهَةٍ وَلَحۡمٍ مِّمَّا يَشۡتَهُونَ

Macam boh kayee Neubri keu gopnyan Ngon sie binatang nyang mangat leupah Peue nyang h‘eut gopnyan cit le troh teuka

52:23

يَتَنَٰزَعُونَ فِيهَا كَأۡسًا لَّا لَغۡوٌ فِيهَا وَلَا تَأۡثِيمٌ

Meureubot sigra pireng deungon glah Meureubot-reubot kon jeut keu dawa Kon na meudacha galak that leupah

52:24

وَيَطُوفُ عَلَيۡهِمۡ غِلۡمَانٌ لَّهُمۡ كَأَنَّهُمۡ لُؤۡلُؤٌ مَّكۡنُونٌ

Aneuk agam dum muda beulia Jiidang sigra peue nyang tapeugah Di sinan sabe jilingka-lingka Sang mutiara takalon indah Intan lam saruek gohlom geubuka

52:25

وَأَقۡبَلَ بَعۡضُهُمۡ عَلَىٰ بَعۡضٍ يَتَسَآءَلُونَ

Peugah le haba meupoh beurakah Meutanyong bandum ke haba jameun

52:26

قَالُوٓاْ إِنَّا كُنَّا قَبۡلُ فِيٓ أَهۡلِنَا مُشۡفِقِينَ

Kamoe dum yohnyan teumakot leupah Takot keu dacha geukheun watee nyan

52:27

فَمَنَّ ٱللَّهُ عَلَيۡنَا وَوَقَىٰنَا عَذَابَ ٱلسَّمُومِ

Teuma bit Tuhan Maha Pemurah Ka Neubri nikmat bandum geutanyoe Hana roh tanyoe lam apui mirah Hana roh tanyoe lam apui peudeh

52:28

إِنَّا كُنَّا مِن قَبۡلُ نَدۡعُوهُۖ إِنَّهُۥ هُوَ ٱلۡبَرُّ ٱلرَّحِيمُ

Sabab tapateh dumpeue peurintah Taseumah Tuhan nyang gaseh sayang Lagi pih Tuhan Maha Pemurah

52:29

فَذَكِّرۡ فَمَآ أَنتَ بِنِعۡمَتِ رَبِّكَ بِكَاهِنٍ وَلَا مَجۡنُونٍ

Teuma di gata beu tapeuingat Tuhan bri nikmat gata tan salah Gata tan gila nikmat Po gata Lom pih kon gata tukang meurajah

52:30

أَمۡ يَقُولُونَ شَاعِرٌ نَّتَرَبَّصُ بِهِۦ رَيۡبَ ٱلۡمَنُونِ

Jikheun lom gata ureueng meupanton Tapreh meu pajan keunong musibah Tapreh ceulaka keunong ateuh jih

52:31

قُلۡ تَرَبَّصُواْ فَإِنِّي مَعَكُم مِّنَ ٱلۡمُتَرَبِّصِينَ

Takheun boh tapreh atra lon peugah Di lon pih lon preh sit lagee gata

52:32

أَمۡ تَأۡمُرُهُمۡ أَحۡلَٰمُهُم بِهَٰذَآۚ أَمۡ هُمۡ قَوۡمٌ طَاغُونَ

Lom pih jih saja meunan jipeugah Meunyo kon lom pih jidarohaka

52:33

أَمۡ يَقُولُونَ تَقَوَّلَهُۥۚ بَل لَّا يُؤۡمِنُونَ

Jikheun tapeuna taba risalah Tapi cit jih dum han jimeuiman

52:34

فَلۡيَأۡتُواْ بِحَدِيثٍ مِّثۡلِهِۦٓ إِن كَانُواْ صَٰدِقِينَ

Cubaci kaman jih peugot bagah Cubaci peugot lagee nyan bisa Meunyo bit beuna peue nyang jipeugah

52:35

أَمۡ خُلِقُواْ مِنۡ غَيۡرِ شَيۡءٍ أَمۡ هُمُ ٱلۡخَٰلِقُونَ

Atawa hana soe nyang peujeut jih Jeut keudroe di jih han peue geuulah Atawa di jih jipeujeut droe jih

52:36

أَمۡ خَلَقُواْ ٱلسَّمَٰوَٰتِ وَٱلۡأَرۡضَۚ بَل لَّا يُوقِنُونَ

Atawa sit jih peujeut blah bicah Peue jih nyang peujeut langet ngon bumoe Kon yakin jih nyoe meu nyan jipeugah

52:37

أَمۡ عِندَهُمۡ خَزَآئِنُ رَبِّكَ أَمۡ هُمُ ٱلۡمُصَۜيۡطِرُونَ

Peue na bak jih nyan gudang areuta Nibak Po gata bak jih Neukeubah Peue na kuasa dalam jaroe jih

52:38

أَمۡ لَهُمۡ سُلَّمٌ يَسۡتَمِعُونَ فِيهِۖ فَلۡيَأۡتِ مُسۡتَمِعُهُم بِسُلۡطَٰنٍ مُّبِينٍ

Peue na rinyeun jih nyang panyang leupah Jiek u langet jideungo haba Meu keunoe kaba laju beubagah Jiba ngon dali nyang trang ngon nyata

52:39

أَمۡ لَهُ ٱلۡبَنَٰتُ وَلَكُمُ ٱلۡبَنُونَ

Peue aneuk dara di jok keu Allah Aneuk nyang agam bandum keu gata

52:40

أَمۡ تَسۡـَٔلُهُمۡ أَجۡرًا فَهُم مِّن مَّغۡرَمٍ مُّثۡقَلُونَ

Peue bak jih dum na talakee upah Jeut jih dum teuma geuhon ngon utang

52:41

أَمۡ عِندَهُمُ ٱلۡغَيۡبُ فَهُمۡ يَكۡتُبُونَ

Peue na bak jih nyan ‘eleumee Allah ‘Eleumee gaeb nyang tan gop teupue Jituleh dumpeue beuna ngon salah

52:42

أَمۡ يُرِيدُونَ كَيۡدًاۖ فَٱلَّذِينَ كَفَرُواْ هُمُ ٱلۡمَكِيدُونَ

Peue napsu jih keumeung teumipee Jipeugot lagee jimita hilah Nyang keunong tipee meuhat si kaphe

52:43

أَمۡ لَهُمۡ إِلَٰهٌ غَيۡرُ ٱللَّهِۚ سُبۡحَٰنَ ٱللَّهِ عَمَّا يُشۡرِكُونَ

Peue na jipike laen jiseumah Peue na di jih Tuhan nyang laen Nyang jikheun Tuhan nyang bukon Allah Allah Taʻala Maha Suci that Tan meucharikat lagee jih peugah

52:44

وَإِن يَرَوۡاْ كِسۡفًا مِّنَ ٱلسَّمَآءِ سَاقِطًا يَقُولُواْ سَحَابٌ مَّرۡكُومٌ

‘Oh ban jikalon geurupeng langet Jikalon ka rhet galak jih leupah Jikheun le awan meulapeh-lapeh Ujeun di sideh keunoe jiruwah

52:45

فَذَرۡهُمۡ حَتَّىٰ يُلَٰقُواْ يَوۡمَهُمُ ٱلَّذِي فِيهِ يُصۡعَقُونَ

Bah keuh jih meunan bek tapeuduli Atra nyan geubri keu jih sit bagah Akan meureumpok ureueng nyan ngon jih Teukeujot that jih hanaban peugah

52:46

يَوۡمَ لَا يُغۡنِي عَنۡهُمۡ كَيۡدُهُمۡ شَيۡـًٔا وَلَا هُمۡ يُنصَرُونَ

Uroe nyan teuma hana le guna Dum tipee daya jipeugot ulah Hana le hilah hana soe tulong

52:47

وَإِنَّ لِلَّذِينَ ظَلَمُواْ عَذَابًا دُونَ ذَٰلِكَ وَلَٰكِنَّ أَكۡثَرَهُمۡ لَا يَعۡلَمُونَ

Awak nyang lalem azeub sileupah Azeub nyang laen geubri dum keu jih Nyang le that di jih hana jipapah Bandum atra nyan hana jiteupue

52:48

وَٱصۡبِرۡ لِحُكۡمِ رَبِّكَ فَإِنَّكَ بِأَعۡيُنِنَاۖ وَسَبِّحۡ بِحَمۡدِ رَبِّكَ حِينَ تَقُومُ

Tasaba jinoe teuma bek susah Di gata jinoe beu that tasaba Hukom Po gata nyang Maha Murah Gata sit sabe meungieng le Kamoe Bak mata Kamoe hana tom leupah Takheun teuseubeh pujoe Po gata Oh watee jaga sabe di babah

52:49

وَمِنَ ٱلَّيۡلِ فَسَبِّحۡهُ وَإِدۡبَٰرَ ٱلنُّجُومِ

‘Oh watee malam pih bek tapiyoh Teuseubeh sunggoh tapujoe Allah Sampoe ka gadoh dum bintang-bintang Uroe keumeung trang peungeuh dum sudah

Translation: Tgk. H. Mahjiddin Jusuf.